السلام عليكم اليوم قصة جديدة حقيقية ومثيرة علابالي بلي مراحش تحبو لي راح تقراوه ولكن بطلة القصة ماتت طلبولها الرحمة والمغفرة صديقتها لي بقات على قيد الحياة هي لي راها تحكي وتقول كنت انا وصحبتي اكثر من التوأم نتفارقو فقط عند النوم ومرات نرقدو مع بعض كنا نسكنو بلاصة وحدة دارنا بجنب دارهم هي وحيدة امها وابوها وانا طفلة وحدة في وسط 4 دكورة كنا كما رية وسكينة تلقاينا وحدنا ديما نجيبو في خبورات الناس نحوسو على هذا وهداك الناس كامل نعرفو اسرارهم لي مصاحبا ولي راجلها خادعها ولي خادعا راجلها ولي خاطبة ولي راحت للحمام ولي شرات شكيرات حليب حنا واحد مايشوفنا ولا يعرفنا ولايسمعو حسنا ولكن حنا كلش نعرفو خبارهم المهم داك الوقت مكانوش ليبورطابل والفيس مكان كاين والو وهذاك العام دخلونا تليفونات الفيكس
في دارنا عندي خاوتي مانقدرش نمسه ولكن ريمة صحبتي كانت ضل وحدها بحكم امها تخدم وابوها يخدم كنا نقراو الثانية ثانوي مكنا لا شابين ولا حد يشوف فيينا ولا يحوس علينا كنا انا وهي برك المهم جات العطلة نتاع 3 شهور والكرهة والديڨوطاج بدا
هي ضل وحدها وانا نكمل شغالاتي ونروح عندها نتلف الوقت ونضلو نوقبو على الجيران مرة وحدة جارتنا متزوجا جديد صغيرة وكانت مغزلتنا بالغيرة الصباح كنا مع بعض نوقبو شفنا راجلها في داره يدور بديباردور رمادي وكي جا خارج لبس تريكو كحل شفناه برا خلينا جات العشية كي قرب وقته باش يجي عيطنا لمرته في الفيكس هذي كانت فكرة ريمة عيطت هي وقاتلها انت فلانة مرت فلان قاتلها ايه شكون انت قاتله انا ضرتك ولا لي راح نصير ضرتك مزال متزوجناش هذا وين خرج من عندي ماصدقتناش في الاول ومنبعد بقات ريمة تقلها هاواش راه لابس ولابس من تحت ديباردور رمادي خلاص بدات تتوسوس وصدقتنا وكي جا راجلها بهدلاته ودارو دبزا سمع بيها كامل الشعب وراحت غضبانة لدارهم جاتنا لعبة وضحكنا حتى متنا وياريت حبسنا غير عند هاذي وماكملناش اللعبة الخطيرة لي مافقناش حتى كانت طفرت وريمة خسرة حياتها
الجزء الثاني
اليوم الثاني نايضين فرحانين من النصر لي حققناه البارح ونخمو في كاش مصيبة جديدة نخدموها كانت قدامنا وحدة تسكن قدنا في العمر وكانت تحب واحد وهو يحبها كانت شابة وقاع ماتقيمش حاطة روحها حاجة خشينة كنا نعرفو الطفل نعرفو وين يسكن ولدمن مش بعيد علينا ولد الحومة كما يقولو حتى هو يضل مقابل بابهم وعندها واحد خوها بغل ماشي بنادم مكانش معاه الضحك عيطنا رفدت هي كوبينا قعدنا كما نعيطو نسيت ماقتلكمش في الاول كي دخلونا الهاتف عطاونا كتاب صغير فيه جميع ارقام المنطقة نتاعنا من اطباء لمحلات لاشخاص وهاذو لي لقيناهم وتأكدنا بلي هوما صح عيطنا فيهم المهم بقينا ديما نعيطو وحد 3 ايام ولا ربعة باش عاد رفد علينا خوها قتله ريمة سلام انت فلان قالها ايه واش خصك قاتله انت خو فلانة وهي مكانتش في دار قالها ايه انا خوها ايا حكاتله راها مصاحبا فلان ولد فلان وضرك راها معاه وعسها دك كي تجي يجي هو يقابلها وراه يلعب بيها وحب يرفدها الكرش ويهرب وكوبات ونسمعو العياط وتهراس لماعين شوية هاك وجات هي من الباب شدها عطاها طريحة كحلة دخلت لسبيطار قعدت فيه 15 يوم وخوها دخلت للحبس حتى تنازلت على الشكوة باش خرجوه وحرمو عليها الخرجة ودخلة وبطلوها من القراية وبقينا نلعبو جاتنا ضحكنا وقاع هاذ الشي ومزال ماحشمناش
وحد النهار مشينا للحمام وحنا تم نسمعو في الحكايات من.... يتبع
الجزء الثالث كانت قاعدا قدامنا جارتنا تتحمم وشايخة مع وحد المرا تشكيلها على البق الحشرة لي تعشش في اللوح قاتلها راه ساكنلي في التيق في القرياجات قاع كلاهم ورشاهملي قاتلها على وحد الحشيش شريه حمصيه و حرقيه مليح ودڨيه ودريه في كموسات وين تشوفي البق حطي في ديك البلاصة كموسة راح يشمه ويموت وكما كان الحال هي حنا عسيناها مليح ريمة تريح ونوض انا انا نريح تنوض هي حتى شفناها دارت 2 كموسات وعلقتهم في وحدة في الباب نتاع البالكو و حدة في القرياج نتاع تاقة حنا قدامنا غير البرطمات ونشوفو كلش هذا يطل على هذاك حتى ومانشوفوش يضلو النسا نتاع البلوك دايرين جماعات ويحكو على بعضاهم المهم شفناه وعسيناها نهار مكانتش تم عيطنا في المقيل راني حاصيا عليها هضرت معاه ياربي سمحلها كانت تعرف تغير صوتها وماتضحكش كي تكون تهضر اما انا كي يقولو الو نطرشق بالضحك المهم خشنت صوتها وقاتله الو قالها شكون قاتله فتيحة الڨزانة انت مرتك خيرة قالها واه قاتله فوتهالي قالي واش تستحقي من مرتي علاه حابة تحكي معاها قاتله نساللها دراهم كبار وحابة تاكلني فيهم والله تجيبهم والله نخدم فيكم المنكر الراجل خاف وقالها نتاعش هذا الدراهم واش دات عليك قتله جات عندي دارت سحور لراجلها باش مايتزوجش عليها ويبقى غير تحت رجليها حبت ترجعه دلدول وهي لي تحكم فيه ياخوتاتي الراجل هبل وطار عقله هي تم تم كوبات عاودت شوية وعيطت غسلها بسبان وقاتله انا خاطيني عطوني دراهي قالها والله نشتكي بيكم وندخلك انت وياها للحبس هي خافت قاتله شوف نسمحلكم في دراهم ونزيد نقولك وين راه السحور قلعه وبول عليه ورميه في التوالات ينفك السحر وماتشكيش بيا وانت ومرتك ضبر راسكم خمم ورجعلي وكوبات بقينا وحد الشوية عاودت عيطت قاتله يادرا واش قلت قالها صح قاتله حلفلي على المصحف قالها واه نحلف قاتلها لالا حل كامل تواقي والبالكونات وقعد وسط الصالة وحلف على المصحف وجنوني يشوفوك ويقولولي عاد باش نقولك مكان السحر ونقدر نفكه دار واش قالت هي تهضر وانا نعس فيه وصح شفناه دار واش قاتله و الراجل صح ميت بالخوف
قاتله السحر راه بلاصة الفلانية قاتله قتلها حطيه من كل بلاصة يدخل منها الهوا شوفه في التيق والبيبان وربي يسمحلي وكما قتلك بول عليه ورميه في التوالات كوبات وبقينا نعسو في الراجل صح لقا وبدا يضبح الناس قاع سمعاته ويقول حسبي الله ونعم الوكيل لا يفلح الساحر حيت اتى حسبي الله ونعم الوكيل ان الله سيبطله وحنا ميتين بالضحك ربي يسمحلنا وفي ديك العشيا جات مرته ياخواتاتي شرمطها قطعها وحب يرميها مع البالكو حتى الغاشي سلكوها خفنا وهاكداك ماحشمناش وراحت هربت لدارهم وصلو لطلاق ولكن الحمد الله ماطلقوش
الجزء الرابع
وحد النهار كنا مريحين لقينا رقم وحد الدار قدامنا ماعندهم مشكل جابدين رواحهم مانسمعو عليهم حتى حاجة راجل ومرته وعندهم بنت ولد قررنا نحكو معاهم ونهضرو في بنتهم ونقولو بلي راها بالكرش انا قلت لريمة مايصدقوناش الطفلة صغيرة وتروح مع باباها قتلها ولدهم كبير كاش ماضبريله خطة قاتلي ايا نعيطو ونقولولهم بلي ولدكم فسدني وراني بالحمل ورايحة نشتكي بيه الا مجاش خطبني هذا السمانة ايا خلاص تفاهمنا على الخطة والكلام كيفاه راح يكون عيطنا رفدت عليها يماه كانت جوايه 1 بعد الغذا الو سلام طاطا واش راكي قاتلها لباس بنتي شكون انتي قاتلها واسمني نجاة انا حبيبة سيد احمد ولدك سكتت المرا قاتلها واش حابة قاتلها ياطاطا ربي يحفظك جيتك قاصداتك بجاه ربي والنبي توقفي معايا ياطاطا ولدك لعب بيا وراه حاب يتهرب وراني شاكة في روحي بالحمل و الا مجاش يخطبني خاوتي يذبحوني ويقتلوه قوليلو يا سيد احمد يهديك ربي خاف مولاك ياك طمعني بالزواج ودالي شرفي وسمح فيا المرأة مزادتش نطقت تبكشت عيينا الوو الووو والو المرا تشوكات كوبينا وقعدنا شوية مكان والو ماسمعنا حتى حس كامل النهار وحنا لاسقين في التاق باش كاش مانسمعو والو حتى ليل وحنا رقدنا وغدوة من داك على الصباح جوايه 10 عيطنا الو رفدت عليها الو صباح الخير طاطا واش بيك تقلقت عليك البارح قاتلها يابنتي قوليلي الا راكي بصح ولا راكي تكذبي البارح ولدي حلفلي على المصحف مايعرف حتى وحدة واسمها نجاة بداة صحبتي ريمة زعما تبكي وقاتلها هذا وين جيت معند الطبيب وقالي صح راكي بالحمل بقات المرا تعاير فيها وقاتلها شو شكون لعب وجاية تمسحيها في وليدي وبلاك انت وليدي قاع ماتعرفيهش وكوبات علينا مور الظهر عيطنا عاود قاتلها ياطاطا انت اسمك هاواش اسم راجلك واش يخدم واسم بنتك وين تقرا و و و بقات تعطيها في المعلومات وقاتلها جيتك بنيتي وقلت تخافي ربي وتوقفي معايا وانت محبيتيش انا رايحة نحكي لخاوتي ونروح نشتكي خليني نموت وخلي حتى هو يموت مين مراكيش حابة توقفي معايا خاوتي عندي 4 والله مايفهمو المرا بدات توغ وتعيط كوبينا حتى شوية هاك نسمعو سيارة الاسعاف جات داتها المرا مريضة وطلعتلها لطونسيو قريب ماتت المرا رايحة تموت وحنا والو ماحشمناش وجايتنا ضحكة وكل يوم نتماداو كثر
الجزء الخامس
المهم باش مانطولوش الحكاية بزاف كنا كل يوم نديرو مصيبة جديدة وكل يوم يزيد ابليس يقوينا كثر بالمعلومات وفضحنا شحال من وحدة وخربنا شحال من بيت حتى تسببنا في العداوة بين الاخوة والاهل وكل هذا ماحشمنا ماقلنا خلاص وحد النهار كان قدامنا واحد الحانوت مول الحانوت كان شاذ ويدخل الاولاد تم ويغتاصبهم وكان واحد من الحومة كل يوم يدخل عنده في القايلة نشوفوه لكن ماكناش دايينها فيه ماكناش عارفين حتى وحد النهار وانا في دارنا نسمع في خاوتي زوج يهضرو عليه ويحكو ويقوله خرجت فيه كما ولداته امه مع بولحية في ليل ومش غي انا شحال من واحد شافهم وكي تفضحو مراهمش يروحو لديك البلاصة راهم يتلاقو قي المحل كاش نهار نزدمو عليهم نطق خويا الثاني قاله نشتكو بيهم خير ملي نزدمو عليهم خلي الدولة هي لي تقرر مصيرهم وبقاو يحكو ونا نسمع الصباح رحت ليها نجري خبرتها بكل الحكاية وياااريتني مدرتهاش المهم حوسنا على رقمه مالقيناش وكانت عنده خته خياطة قاتلي ساهلة راه عندي وحد القماش عطاتهوني خالتي رواحي عشية نروحولها روحنا دخلنا عندهم اسقتبلونا باباها واعر بزاف وهوما البنات قاع مايخرجوش من الدار عندهم زوج ولاد واحد عسكري والثاني كما قتلكم ش...ذ روحنا قالتلها حابة نخيط صح تفاهمو على كلش كي جينا خارجين قاتلها سمحيلي انا نخاف من باباك الا عندكم رقم تليفون منا على سمانة راني نعيط الا كملتيها نجي ولا ماكملتيهاش مانبقاش غير نخطط عليك وكما كان الحال اتحصلنا على الرقم وجينا عسيناهم مليح والو مكان حتى حاجة دوك ليامات حتى لوحد النهار شفناه جا وقعد معاه عند الباب نتاع الحانوت
الجزء السادس
عيطنا ترفد علينا امرا نقطعو نعيطو ترفد علينا عاود نقطعو وحد العشر مرات هاكداك حتى رفد علينا باباهم وهو يعيط ويسب خشنت صوتها وهضرت معاه الو عمي براهيم قالها ايه شكون معايا دارت روحها طفل قالتله شوف الحاج وليدك راه في الحانوت الفلاني ولدك راهم يتعداو عليه و راه لي يجي يركب فوقه وراه هاذا الشي منكر كبير مانقبلوش بيه وراهم جايين الدولة يرفدوه الا تجري تنقده انا فاعل خير وماحبيتش ليك الفضيحة قلت نقولك وانت تربيه هي عاد تهضر ونشوفو خرج يجري كوبات وجات ليا وبقينا نطلو والمصيبة كانو لداخل ومقفلوش الباب مليح عان الباب عليهم ودخل وشاف ولده في داك المنظر لا حول ولا قوة الا بالله راني نحكي وبكي ندمت ندمت على كل لحظة ضحكت فيها وعلى كل واحد ضيعتله حياته واش نقولكم ربي يسمحلنا دخل ولقاه في داك الوضع وقتله ضربه بخدمي للقلب ونسمعو العياط بولحية هرب و عمي ابراهيم خرج من الحانوت وقعد قدامه وهو غير دمومات ويبكي ويقول الله لا يرحمك وسخت اسمي بهدلت بيا وانا وريما الدم جمد فينا ياربي واش درنا فقنا وضربتنا الفيقة ياربي واش هذا تعانقنا وخرجنا للبالكو تفرجو ونبكو الحومة تعمرت بالغاشي وجاو لابوليس والاسعاف خرجوه من الحانوت مغطي و يقطر بالدم وعاود خرجو قشه الله يغفرله ويغفرلنا حتى حنا ويرحم ريمة حبينا نتوبو ولكن ولكن لا حولة ولا قوة الا بالله واش نقول واش نخلي خسرت نفسي وصحبتي خسرت حياتها لا اله الا الله المهم نرجعو للحكاية
الجزء السابع
قعدنا مدة 15 يوم دموعنا مانشفوش كل يوم نلومو رواحنا نتفكروه ونبكو وحلفنا نحبسو مانزيدوش نخدمو هذا الخدايم خلاص اتفقنا بااش نرجعو نقراو القرآن ونحفظو لعلا القرآن يشفعنا عند ربي فوتنا وحد السمانة مكان والو وحد النهار قاعدا في دارنا حتى تعيطلي في رواحي ضرك رواحيلي ضرك طريق قتلها راني جاية قلت بلاك طاحت ولا نحرقت راها وحدها خلعتني مشيت نجري عندها فتحتلي وجها كحل وقاتلي مصيبة ياربي واش درت في روحي قتلها واش كاين انا نسقسي فيها وهي ترعش حتى صونا تليفون نخلعت وبقات تصتفڨ قتلها مالك رفدي رفدت بسيف لقاتها يماها تسقسي عليها قاتلها راني رايحة عند خالتك راها مريضة مانجيش بكري دري العشا صح كوبات قتلها اهضري مالك قاتلي عيطلي واحد وقالي انا نخدم في خدمة الهاتف في السنترال وقاع المكالامات نتاعك راها مسجلة عندي وجات الشرطة تحوس على الرقم لي عيط لراجل لي قتل وليده بقالهم يومين ويجو يدو الرقم والتسحيلات ولكن انا حتاجيتك تساعدني في امر الا قبلتي وقدرتي راح نمسح كلش ومايقدر حتى واحد يجبدك هي تحكيلي وهو عيط وانا شادة في راسي ونخبط قتلها قوليله خليلي مهلة اليوم نفكر وربي يديرلها تاويل قالها صح وقطع الاتصال ياخواتاتي حسيت بخدمي في صدري وعرفت ااحكاية مش راح تكمل على خير وعرفنا بلي مصيرنا راه مجهول وقادر بضحكة نوصلو لأمور كبيرة
الجزء الثامن
المهم قعدنا هديتها شوية وتهديت انا قتلها صبري نسمعو واش راح يقول ومنبعد نقرو قتلها نوضي انت دري عشاتك وغدوة نوض بكري نكمل شغالاتي ونجي ليك نقعد معاك قاع النهار ونشوفو واش نديرو روحت لدار فاتت ديك الليلة بسيف وحنا نخمو واش راح يقولنا جا الصباح اخيرا كملت صوالحي ورحت عندها قعدنا قعدنا شحال حتى عيط الو واش قررتي قاتله حتى نعرف في واش تحتاج المساعدة قالها عادي كما كنتي تخدمي قالها باش نكون صريح معاك انا متزوج بوحدة مريضة نفسيا وحابك تعيطيلها وتقوليلها بلي انا عشيقة راجلك هي بخير عليها وحاب نزعفها باش يزيد ااحال عليها وندخلها لسبيطار المهابل ونتزوج مع لي نحبها هذا مكان ساهلة قتله وحد العشر دقايق وعاودلي قاللها رايحة تتفاهمي انت وصحبتك قاتله كيفاش عرفت قالها كلشي علابالي بيه خمسة دقائق ونعاودلك تكوني قررتي كوبات وحكاتلي قاتلي حتى وصلنا واحد للموت نزيدو هادي باش ربي يسترنا ونحبسو خلاص قتلها مانيش مريحا للموضوع قاتلي عندك حل من غير الموافقة قتلها لالا عيط قاتله موافقين عطاها الرقم نتاعها وحكالها كلش مواصافاتها ومواصافاته واش راه لابس واش واش كلشي كوبات توكلنا على الله وعيطتلها
الجزء التاسع
عيطتلها قاتلها الو انت وهيبة مرت محمد قاتلها ايه قاتلها اسمعي راه جا خطبني وسمعت بلي متزوج وماصدقتوش حبيت نتأكد برك المرأة تحكي بكل برودة وتضحك قاتلها بصح قاتلها وقتاه تطلقو وتخرجي من دار باش نتزوجو انا وياه قاتلها انا مانيش مصدقاتك عارفاته بلي مايقدرش يخوني قاتلها علاه واش تكوني قاتلها مانقولكش هو يعرف المهم طولو في الحكاية ولكن ماقدرتش تزعزعلها شعرة قطعت عيطلها هو قالها هواش راني لابس وقولها كان عندي عاودت عيطتلها لقاتها شوية مقلقا قاتلها مالك قاتلها جا عندي وراح ضحكت وقاتلها قولي والله قاتلها مراكيش مصدقا قاتلها راه لابس سورفات كحلا لي شريتيهاله من وهران كي رحتي لطبيب انت وامك ولابس من تحت كلش بيض أمنتي ولا نزيدك البارح دابزتي معاه وحب يضربك نزيدك ولا خلاص المرا هنا خلاص طار عقلها ومابقاتش تجمل كوبات عليها وحد نص ساعة وعاودنالها قاتلها ايه واش قلتي تطلقو ولا نتزوج ونديه لبلادي انا نسكن بعيد قاتلها شحال خاصك وتخطيه قاتله بزاااف قاتلها طلبي قاتلها 100 مليون ضحكت وقاتلها نعطيك 150 مليون وخطيه قاتلها خليني نخمم قطعت ريمة الخط تم تم عاودلها راجلها قالها ايه قبلي ندي دراهم ومنبعد نشوف كيش ندير ونتهلى فيك انت وصحبتك قاتله وعندها الدراهم قالها وكان تطلبي 200 اخرى تعطيهالك عادي صح عيطنا قاتلها موافقة 150 قاتلها رواحي غدوة الصباح عندي لدار وحدك دي دراهم وروحي مانزيدش نسمع حسك قاتلها اوكي انا بدا قلبي يتزير قتلها مكان لاه قاتلي مكاش حل اخر المهم عطاها العنوان ماشي بعيد علينا بزاف لبسنا الصباح انا وياها قلت لدار رايحة معاها تنحي الضرس راها خايفة ونجو مشينا برطما تسكن في الدور الخامس هي طلعت وانا بقيت نستنى فيها لتحت ساعة ساعة ونص ساعتين مانزلتش وانا خلاص بغيت نموت
الجزء العاشر والاخير
بقيت نستنا والو طلعت لحقتها طبطبت مكانش لي فتح زدت طبطبت بجهد قاتلي شكون قتلها انا صحبتي دخلت عندك وماخرجتش فتحتلي الباب ولكن بقى محكوم بهذيك سنسلة كي شفتها خفت منها صح تخوف قتلها عيطي لريمة قاتلي شكون ريمة قتلها صحبتي دخلت عندك مالك شفتها قاتلي راكي غالطة ايا مشي منا و بلعت الباب في وجهي هبطت ياربي كيفاه ندير ضرك انا هاكداك نرعش وماحبيتش نتزعزع من بلاصتي خفت كاش متهرب ولا تروح بيها وماعندي حتى دليل جا فايت عليا صاحب خويا نعرفه مليح شافني ماحبش يحكي معايا حط راسه انا لغيتله قتله شوف رحمة على والديك تروح تلغى لخاوتي وقلهم راني هنا نستنا فيهم قالي علاش واش كاين قتله صحبتي ريمة بنت الحاج موسى طلعت عند وحد المرا وراني في ثلث سوايع هنا نستنا وكي طلعت نلغالها قاتلي مجاتنيش وخايفة كاش مادرتلها قالي صح صبري راح يجري وجاب زوج خاوتي كنت عارفا راح يقتلوني بصح في ديك اللحظة كنت نخمم غير في ريمة جاو 2 خاوتي ومعاهم صاحبهم قتلهم جات تتسخر عند وحدة المرا وقاتلي خفا نهبط وهذي 3 سوايع مجاتش وكي رحت قاتلي مكان والو مجاتني حتى وحدة بقا معايا خويا وراح خويا وصاحبه طبطبو عليها عياااو يطبطبو والو مكانش لي رد عليهم قالي خويا نعيطو لابوليس البلاصة فارغا وكانو خاوتي يهضرو بالفور الناس بدات تتلايم حتى نسمعو حاجة ارتدخت من فوق هاذيك المرا رمات روحها جات الشرطة وكبرت الحالة وطرطقو الباب لقاو ريمة الله لا يشوفكم مقطة تقطاع والمرأ حسبتها راها جاية وحدها وكي كثرنا عليها الحس خافت ورمات روحها من الطابق الخامس ماتت وانا دخلت للحبس عام و6 شهور ودارنا تبراو مني وراجلها خرج برائة كذب كلش وماعندنا حتى دليل عليه اصلا مانعرفوهش لا هو ولا لا وراني عايشة في دار الرعاية يتهلو فيا الجمعيات وهادي هي قصتي انا والمرحومة ريمة نتمنى تاخدو منها العبرة وربي يرحم لي ماتو وربي يغفرلنا جميعا 
إرسال تعليق