الحلقة 1 : شاروخان نحبك ربك , ياو انا نموت فيك ارواح نديرو المشهد تاع يطيرو لحوايج فسما طيط طيط طيط دخلت يما تجري لابسة بليغة فردة كاينة وفردة مكاش شعرها طالع فسما تحوس على الصفاية تاع القهوة 😂 يالهجالة الفايحة نوضي ترمتك لسقت فلبلافون نوضي وراهي صفاية تاع لقهوة وين , وانا وين علبالي شوفي نتي وين درتيها كي كنتي تعمري قاعدة تعشقيلي في بابا وريوڤ يسيلو منبعد ارواحي ڤوليلي وراهي 😂 بسم الله نعرفكم بروحي انا مزهورة بصح جامي شفت الزهر فحياتي عايشة مع يما وبابا بطبيعة الحال يما تحكم مسكين يغيضني تحكمو تلوحو برا 😐 و خويا لي يفليكسي لمادامتو خمسالاف يقولها نعيشك لابال في فيامات اوت كنا مريحين فصالو كل واحد وين متلايح كي لكلب صونا تيليفون تاع يما الو لاباس حمدلله اوب عرس وليد خالتي ويادلالي يما ناضت تزغرت بصح ولله لي يسمعها يحسب هاديك لمعزة لي يخدمو بيها الميمز 😂 معليش ناضت يما قالت لبابا ضوك تحطلي 6 ملاين بابا شاف فيها هاااااك ( اتخيلوها نتوما مخرج عينيه كي طورو 😂) قالها ولاهلك سيكس مليون يالالا قاتلو بو جمعة جموعتي ارواح نسحقك لشومبرة ويا دلالي بابا ولا كي توم جيري كي يشوف هاديك لقطة راحو لشومبرة جابت ست ملاين وجات ها خيرة ياميمتي كي درتيله عطينا لكود نديرو كيما نتي 😂 شافت فيا هاك
الحلقة 2 راحت يما لمت لكابات تحسب مطار هواري بومديين وانا خرجت روحت لميت ڤاع لبسة تاع لحومة خص غير نويزات تاع دم ماديتهاش 😂😂 وقالت لبابا غدوة تديني لدارنا (بحكم العرس فدار لكبيرة ) ماعليناه رقدنا غدوة منداك يما تحسب وقفلها شعر جات على 6 تاع صباح تعيط وضبح نوضي غسلي كيلوطاتك 😐 وزربي لمي ترامك رانا رايحين امينة (مزهورة اسمي دوزيام ) 😂: يما وشبيك هبلتي عليه ول ياك عندو يماه وهي تستكلف بيه يما بي لايك تسما انا مشي بنادم 💔🤕 خيرة : وياماخيتي نها ماخدمت عليه وغسلتلو خراه نها 😂 امينة خلاص يما خلاص مديريش هنا تاع شيعة تبداي تندبي مكاش لي يسكتك خيرة : تسما انا نندب ارواحي ويا خاوتي هاديك لبليغة لخضرا وطيح عليا في تر متي شوطتها 💔😂 روحنا لدار ماني فلمازدا وانا نطبل فلباسينات ونزغرت 😂 وصلنا هبطلت نكركر فلكابات دخلت سلمت على ماني قاتلي كبرتي ربيتي ترام 😒 وثرني ڤاع عجبتكم ترمتي هاكولو سباڤيتي بلخبز يخي يخي قعدنا شوية اووب جا لعريس وخووووووه اكدووولي على خوووووووووووه ليوم يسموك تاعي لابغا نطلڤك لابس شورت كحل وتريكو كحل وباسكات بيضة و كاسكيطة 💔 قلبي الصغير لا يتحمل مهم هو وبماه وراجلي و ختهم بدينا نوجدو للعرس لي بقالو 10 اياااام
الحلقة 3 ايا قتلكم بدينا نوجدو للعرس ونا بديت نغسل فلماعن حتى وجعني قلبي تفكرت عرسي لي حبس نص بسبت رخيس نقشمان 💔😂 حكمتني القنطة كملت غسلت لماعن بنات خالتي هوما يضحكو وانا لالا دخل رؤوف ( خو لعريس ) خمس معاهم ڤاع كي لحق لعندي بدا يضحك قالي نتي معفونة باسكو من صغرنا يقولهالي كشغل مشي موالفة نزعف قتلو ايه معفونة علبالي كشغل لقيتها سبة باش نبكي خرجت وخليتهم روحت قعدت فلاطيراس تحقق لحلم تاع حوايج يطيرو وشعر يطير مي هاد لمرة بلبكا جا عندي رؤوف قالي وشبيك امينة قتلو والو قالي من صغرنا كي نقولك معفونة متزعفيش سمحيلي ايدا زعفتك قتلو لالا مشي على هاديك نورمال جامي زعفت قالي مالا وشبيك قتلو تفكرت لباسي 💔 قريب بديت نغنيلو تستقاملك غالية كي تعرف قيمتي 😂😂 قالي ياك رخيس وخرج محياتك قتلو ايه بصح علاش صرا فيا هكدا فواش غلطت انا قالي مشي نتي لغلطتي قالي نتي طفلة مكاش منك مربية ضحايكية على طبيعتك متتصنعيش هبطت راسي جبدني لعندو عنقني قالي خلاص متبكيش ختيتي مسحت خنونتي فتريكوه قتلو منيش ختك 💔😂 قالي واش قلتي قتلو والو قالي خلاص ايا نوضي مسحتي خناينك ڤاع فيا بديت نضحك يعني انا من بكري كان عاجبني نخاف نتشقلب فيه وميجبدونيش😂
الحلقة 4 هبطنا من السطح ونا حاسة روحي مزوجة جديد زعما 😂 مهم بدينا نديرو لميناج روحت لبست جبة دخلتها فلكيلوطة 😂 لازم نطيحو لكلب لفايح مهم كملت شغلي وروحنا ريحنا فلجنينة شوية وانا بقيت فلكوزينة نرهج هاديك لماكلة تاع لبريستيج ماتشبعنيش 😂❤ حتى دخلت بنت عمو للعريس معنتها لافامي لوخرا قاعدة تتزعبل قاتلي بلعقل مراهمش يجرو موراك قتلها نو مابلعقلش لازم تاكلش كيما انا حكمتها وطبعتلها مغرف طعام في فمها باش تعرف معامن تهدر 😒 بدات اووه شيت واش دغتي نتا سوفاج انا صوفاج انا ارواحي حكمتها مشعر مسحت بيها لكوزينة شافنا رؤوف جا يجري قاتلو رؤوف مون بيبي سزكني هاد طفلة صوفاج تون بيبي ارواحي ارواحي حكمني رؤوف كشغل طرزان قالي بلعقل امينة خلاص خليها هربت وخلاتني معاه وانا في قلبي ياربي وتصرا عفسة رومنسية
الحلقة 5 رؤوف :خلاص امينة احبسي امينة : شوف هي واش قاتلي حاسبتنس صوفاج رؤوف باسكو نتي صح صوفاج يعني على وجهي ماتضربيهاش امينة : علاه على وجهك ختك هادي رؤوف :مادامتي امينة مادامتي امينة : يازح حسيت قلبي تكسر مي مبينتلوش قتلو اه سمحلي ربي يدومها طبعتو وخرجت روحت لعند بنت خالتي حكيتلها قاتلي جابلي ربي متعرفيش كيد النساء قتلها وانا وين نعرفو مادوموندانيش 💔😂 قاتلي ارواحي تشوفي نديرلك ميزاجور دخلتني لشمبرة مرت خالي و بدات تسلخ فيا وها ما خيتي طيبتني نقصتلي شوية من شعري لي يلحق لترمتي زيت زيتون تاع قبايل ياه (ديديكاس للقبايل) مهم لبستلي جبة ودوبلاتلي لبونج لفوق باسكو هربو وخلاوني 😂😂 قاتلي دوكا اخرجي وروحي اضحكي ومكلاه تهدري معاه ولا معا هاديك الهجالة بلا راجل
الحلقة 6 شفت روحي فلمرايا واو ولله ماعرفت روحي 😂.رجعتني دنيا بطمة قبل وبعد التحلاب خرجت برا لقيتهم داين لحم باش يمدوه لرجال برا ديتلهم مورصو لجوع ابن عمي 😂 جاز هاداك نهار ورؤوف ماجاش قاتلي اسمهان ( بنت خالتي ) اقعدي فدروج وكي يجي رؤوف ديري روحك تحكي مع كاش واحد طول ماجاش داني نوم رقدت فدروج تحسب ارهابي يستنا فكاش بنادم😂 جا رؤوف مانوضنيش بصح رفدني كان دايني لشومبرة نرقد نا فقتلو بصح ولله مابغيت نوض لابغيتو زعما دخلني لشمبرة حطني فوق لبونك قالي يخي بهلولة يخي 🙂?. نضت صباح لقيتهم ناضو هبطت نشرب قهوة ولبست جبة قصيرة وروحت نسيق وكيلعادة دخلتها ف كوليطة تسما طلعت نص فخاضي يبانو معليناش كنا غير لبنات انا بديت نسيق نسيت روحي بديت نشطح حتا ندور نلقا رؤوف و بلال (العريس) يشوفو فيا 😗 تحسب شافو ميا خليفة وشبيك ياو جاني شفت طفلة تشطح نطق رؤوف لالا جامي شفنا بڤرة تشطح
الحلقة 7 دمعو عينيا قالو بلال حطمتلها لي سونطيمو ايا انا نروح مابغيت نهدر والو يقول السكوت علامة الرضا بصح على ورش رضيت معلباليش,😂 اونفا غدوة لعرس نضنا ڤاع صباح روحنا للحفافة انا حكمتلي شعري كشغل كوت شوفال وبوكلاتهولي روحت لدار لبست غوب موف و طالون blanc وبوشات تاني blanche جيت زلة وخلاص 😂😂 هبطت عند ماما تلاقيت برؤوف فدروج قالي راكي شابة مديتهاش فيه قتلو مغسي لحق وقت اكورتاج خرجت انا واسمهان ملقيناش معامن نروحو لقينا هاديك لفعة خارجة لابسة غوب نواغ قصييرة تهبط تبان ترمتها وطالقا شعرها وراحت عند رؤوف تركب معاه انا معجبنيش الحال قتلها اسمهان ارواحي تشو روحنا عند رؤوف قتلو تدينا معاك قالي اطلعو هي معجبهاش الحال قتلها اهبطي نتي تشوفي انا نركب لقدام تحكمني الدوخة كي نركب اللور 😂 محلتيش جبدتها من الشعر اهبطي حبي اهبطي قالها رؤوف اهبطي اهبطي دوك تعرس بيك هنا هبطت ركبت او روحنا
الحلقة 8 ايا زحقنا لاصال قعدت نبدل لبست كترمن لعروسة بالاك😂 كي لحقنا لاغوب بلونش دخلت لعروسة وبداو يسيربو لاتاي لناس دخلو خاوت لعريس ايا رؤوف مشافش سنيوة تاع لاتاي سخون جا يعفس فوقها طبعتو جات رجلي فيها نحرقت 😪 حلابة علبالي ايا هو بدا يعيط قالي نتي حمارة علاه ترمي في روحك يارب نتي حمارة.قتلو علاه راك تعيط ياك سلكتك قالي متسلكينيش مليحة هكدا 💔😐 قتلو اسمحلي وروحت نكعز باسكو مقدرتش نمشي روحت وين يبدلو لعرايس نحوس على كاش حاجة نديرها حتى تفتحت لباب جا هو لقاني نبكي قالي بركاي متبكي قتلو مدخلكش فيا قالي بلعي واعطيني رجلك قتلو ناس يقولو عطيني يدك ونتا عطيني رجلك قالي يدك ساهلة قتلو كفاه قالي والو بلعي دارلي بومادة تاع لحريق و شاش على رجلي قتلو صحا قالي بلعي قتلك متهدريش كنت نشوف في رجلي هو طلع راسو باسني 😂😂 بديت نعيييط اي غتاصبني يااا ولله نباصيك ماما بدا يضحك قالي بلعي بلعي جا عنقني وقالي نحبك ياااا دنيا عاود عاود ارجا ارجا سايس سايس 😂😂😂 قالي ولله نحبك قتلو وحق ربي اقسم بالله وحق بيت ربي غير نحبك 😂😂❤ عنقني وقالي ايا نروحو كملنا العرس و جا خطبني و موراها بشهر تزوجنا وجبنا توأم مريم و ايمن ❤ النهاية
إرسال تعليق