قصة حب حقيقية - ولد الجيران - كاملة

هادي حكاية تاع صديقة حبت تحكي حكايتها

شكون فيكم عشقت في ولد الجيران كيما انا شكون فيكم عشقت وحشمت تهدر شكون فيكم كانت تتوجع بصمت بلا ما تحكي معاه كانت غير تشوف بعينيها وتسكت انا اسمي حياة حبيت ولد جيرانا من صغري اسمو عماد كان صاحب خويا كان على علاقة بوحدة وكان حب يخطبها حتى نهار لقاها مع واحد اخر الكارتي كامل سمعت بيهم هو كي شافها مع واحد جبد روحو عليها وهي هبلت عليه ماعيات تجي تحاول خواتاتو تقولهم لي كنت معاه كان يهدد فيا بليفوطو تاعي تقلهم كان يقولي تخرجي معايا ولا نروح نقول كلش لعماد المهم هو خلاها باسكو كذبت عليه و خرجت مع واحد اخر ايا انا كان قلبي يتحرق كي كان معاها خواتاتو كانوا يحبوها وكان ناويها للحلال المهم كي تفارقوا قلت هادي هي الفرصة تاعي لازم ندير حاجة باه نحكي مع حبيبي منزيدش نخليه يضيع مني مي حشمت منو و خفت من خويا خممت خممت قلت ندخل للفيس تاعو و نهدر معاه هو امي مع خويا و حاط الفوطو تاعو في البروفيل تاعو درت الكوراج و دخلت للفيس حليت فيس جديد مي بصفة طفلة اخرى محبيتش نقولو راني حياة قتلو السلام عليكم راهو ظهرلي البروفيل تاعك و ليقت مكتوب فيه راك ساكن في قسنطينة وانا نحوس على طبيب تاع القلب في قسنطينة رد عليا قالي من ضمن القسنطيين كامل لقيتيني غير انا قتلو طحت فيك على النية والزهر واذا ديرونجيتك اسمحلي قالي اختي علامن راكي تحوسي قتلو قالولي كاين طبيب مليح في بلاصة اسمها بوصوف في قسنطينة اذا تقدر تعاوني ايا قالي اوكي درك نشوف انا فرحت بزاف لاني قاعدة نهدر معاه حتى من ورا الشاشة من المهم راني نهدر مع حبيبي ايا لعشية خلاص رد عليا عطاني النميرو وقتلو يعطيك الصحة ومزادش هدر معايا سنيتو يهدر مي مهدرش قلت لازم نزيد نهدر معاه كتبتلو قتلو رانا جينا لقسنطينة ومعرفتش وين نروح و كيفاه نروح قالي واينك قتلو راني في لاسانتيفي مع ماما قالي مكانش معاكم راجل قتلو نن وحدنا برك ايا قالي ختي اعطيني النميرو تاعك نعيطلك احسن خير ما تهملوا حرت انا كيفاه ندير مقدرتش نمدلو النميرو تاعي خفت يجي نهار و يعرفني ايا تفكرت لابيس تاع ختي الصغيرة شراتها غير على جال لانترنيت موبليس ومتهدرش بيها خلاص واحد ما عندو النميرو تاعها رحت ركبتها و بعثتلو النميرو و عيطلي ياعمري صوتو يهبل وكان حاب يعاوني على بالي بيه حنين و راجل تاع الصح قالي اهبطي في هاديك الهبطة تلقاي الطاكسيات روحي قلهم يدوك ل بوصوف عند الطبيب الفلاني المهم بقا يهدر معايا وانا نمثل و نخرط هههههههه وهو على نيتو مسكين ايا كان اسعد يوم في حياتي حكمتني السعادة نضحك وحدي ونغني في غناية ابن الجيران تاع نانسي عجرم ايا غدوة عيطلي قالي اختي كيفاه تجيو من بسكرة حتى هنا وحدكم مامعاكم لا راجل لا والو قتلو الله غالب ظروف قالي دريني كيما خوك منين تجيو هنا عيطيلي نوصلكم قالي لبارح كنت مشغول مقدرتش نجي قتلو عطانا الطبيب رونديفو على 3 اشهر قالي شكون لي مريضة انتي ولا امك قتلو انا هههههه كاين في قلبي ثقبة صغيرة قالي يوووو من صوتك تباني صغيرة شحال عمرك عطيتو عمري الحقيقي قتلو 21 سنة قتلو وانت شحال في عمرك قالي انا عماد عمري 29 سنة عطاني كلشي صح ايا عدنا نحكيو ديما يعيطلي و نعيطلو احيانا كنت نشوفو يهدر معايا من الطاقة وانا نطل عليه وهو لا خبر زدت تعلقت فيه و عشقت فيه كثر و كثر حتى واحد النهار قالي بديت نوالف بيك و صوتك حنين بزاف خلاني نتخيل شكلك مع العلم هو جامي حكا معايا حاجة خاطي الطريق كان يحترمني ايا قالي باغي نشوفك مرة وحدة افتحي لاكام تما قلت يا خااااااه كيفاه ندير كيفاه ندير نخاف منحبش نفتح لاكام يخليني وكون نفتح لاكام ويشوفني قادر يقول لخويا و اليوم يذبحني خويا قتلو منقدرش نفتح لاكام راني مش وحدي قالي ابعثيلي فوطو تاعك و نوعدك نسوبرميها ايا قتلو درك نصور بالخيمار ونبعثلك رحت زريت حطيت منشور في جروب تاع بنات قلتلهم انقدوني بصور محجبة حقيقية ايا حطولي خيرت وحدة و بعثتهالو قالي تهبلي الله يبارك قتلو ميرسي ايا واحد اليوم جينا رايحين نقراو كانت الشتا تصب فات علينا هو كنت مع صحاباتي قالنا اطلعوا نوصلكم رانا نعرفوه ولد فاميلا و هو اصلا صاحب خويا من صغرنا نعرفوه طلعنا معاه انا فرحت بزاف مي بقيت ساكتة خفت نهدر يعرف صوتي قالي حياة ختي واش راكي عندي بزاف مشفتكش قتلو حمد لله و درت روحي نسعل باه ميعرفش صوتي وصاحبتي قالتلو واش حوالك مع خولة تقصد صاحبتو القديمة قالها سايي كل واحد راح في حالو وربي يستر عليها المهم بقا يحكي مع صاحبتي وانا ساكتة ومبعد عيطلي قتلو واش درت اليوم قالي وصلت بنات الجيران ورحت نخدم قتلو ملاح ولا نن قالي كاينة وحدة ملي كانت صغيرة وهي متهدرش معايا تقعد عير تشوف معايا قالي اصلا هي حشامة احم احم راه يهدر عليا يا قلبي قتلو مليحة ولا لالا قالي ماعندو ما خصها قالي واش بديتي تغيري قتلو علاه نغير ايا مع الوقت عاد يقولي توحشتك و يقولي حبيبتي باغي نتلاقا بيك باغي نقعد معاك كرهت من الهدرة تاع التليفون وانا كي زدت حكيت معاه عرفت انو انسان صافي وقلبو ابيض حكالي على صاحبتو القديمة وقالي مكتبش المكتوب بينا وانا نكره الطفلة الكذابة واحد اليوم كان عندنا عرس في الكارتي تاعنا دارو السهرة برا طليت عليه من لاطيراس لقيتو حاط الحطة و يشطح جا يقتل تخيلت العرس تاعنا تخيلت روحي نشطح معاه كي كمل العرس عيطتلو قتلو عماد ربي شاهد عليا عمري ما حبيت واحد من غيرك وجامي مسني واحد وجامي بعثت ليفوطو تاعي لواحد لقيت روحي نبكي قالي علاه تبكي قتلو يجي نهار وتعرف تما خفت يعرف شكون انا و يفضحني ولا يكرهني و لا يقولي تمسخرتي بيا مبعد قالي لازم نتلاقا بيك حاس روحي عشقت فيك بلا ما نشوفك قتلو ياك شفتني قالي مع الاول كي حكتيلي حكاية الطبيب صدقتك وحبيت نعاونك مي كي حكيت معاك وعرفتك حسيت انك تعرفيني ودرتي عليا الفيلم هذا باه توصلي لحاجة وعلى هاديك لافوطو مش تاعك قالي يا تقوليي شكون انتي يا كل واحد يروح في طريقو لقيت دموعي يهبطوا وحدهم قتلو وي عندك حق الشي لي قتهولك كامل كذب الحاجة الوحيدة لي صح اني نحبك ودرت الشي هذا باسكو نحبك قالي مام انتي دخلتي في قلبي و باينة بنت فاميلا وتعرفي تهدري قتلو خايفة نقلك تخليني و على بالي تخليني قتلو انا هي الحمارة نوغمالمو كون جا عينك فيا راك جيت وحدك ماشي انا لي جريت وراك كون جا عينك متخلنيش الوقت هذا كامل نشوف معاك من بعيد وانت عايش حياتك وكنت رايح تخطب قالي هبلتيني قبل ما نشوفك شكون انتي قتلو منقولش و روح اخطيني وانساني قالي من واش راكي خايفة انا عمري مارايح نديرلك حاجة مش مليحة وعندي بنات خواتاتي ونخاف عليهم قالي نوعدك ما نديرلك والو قتلو راني حياة جارتكم تشوكاااااا قالي مكانش منها محال حياة تكون عندها العقلية هادي والشطارة هادي قتلو لي تعرفك انت تتعلم الشطارة بالسيف عليها قالي مانيش مصدقك افتحي لاكام قتلو لالا حابة نشوفك قدامي حابة نتلاقا بيك اول مرة وعلى بالي تكون اخر مرة مي دير في بالك راني عشقت فيك صح من صغري ايا ستكيت روحي و عدلت روحي ورحت ليه كي شافني تشوكا قالي وي صح والله راكي حياة قالي صح تحبيني؟ ؟ قتلو نموووووت عليك قالي ياعمري هدرتك عسل مكنتش حاسبك هكا اول مرة يقولي عمري وقالي والله دخلتي في قلبي وجامي هبلت بوحدة كيما هبلت بيك انتي ومانيش رايح نخليك و من وراها خطبني من عند خويا وزوجنا وحطيت في عرسي اغنية نانسي عجرم تاع ابن الجيران و داني لدارو و عندنا 5 اشهر زواج هادي حكايتي مع ابن الجيران ههههههه